الأنبا بطرس فهيم مطران ايبارشية المنياموجها رسالة ترحيب وتوعية لشعب الأيبارشية المبارك

شعبنا المبارك أهلا بكم وبعودتكم إلى كنيستكم التي تفرح بكم، وبعودتكم لها مرة اخرى. حافظوا على أنفسكم وعلى عائلاتكم وعلى كنيستكم وعلى أهاليكم وجيرانكم ووطنكم. مفيش حد هيخاف عليك وعلى صحتك أكتر منك. المسئولية دلوقت بقت مسئوليتك. واحنا معاك وفي خدمتك، بس من فضلك ساعدنا نخدمك ونخدم اخوتك وكل شعب الله، وبلادنا كلها بكل امانة وبسلاسة، وبلاش تصعب علينا المهمة، وصدقني المحبة أهم من أي حقوق ومن أي عبادة ومن أي شيء آخر، لان المحبة هي أم وأصل كل عبادة. ومش مطلوب منك غير التزامك بما يوجه اليك من تعليمات وبطاعتك البنوية للتوجيهات. المحبة المسيحية هتبان في الالتزام. من فضلكم دا مش وقت هزار ولا استخفاف ولا تهريح ولا تهاون، ربنا يحميكم ويحفظكم جميعا. تأكدوا من أن الكنيسة عملت الترتيب اللازم علشان كل واحد من حضراتكم هيحضر قداس على الأقل مرة في الأسبوع. أرجوكم من أجل المسيح خدوا الأمور بجدية لان الوضع في أماكن كتيرة في المنيا بقى صعب وخطر، ومفيش اسهل من نقل العدوى، ناخد احتياطاتنا ونعمل اللي علينا بجدية وأمانة وربنا يكمل ويحمي ويحافظ، بس علشان منلومش نفسنا وميأنبناش ضميرنا لاسمح الله لو حصلت حاجة. من فضلك ساعد أخوك اللي لسة مش فاهم أو مش مقتنع. لو فيه أي مشكلة انا في خدمتكم. اصلي معكم ومن أجلكم ومن أجل كل المرضى ومن اجل كل من هم في خطر وفي قلق وفي ضيق وفي شدة، الرب يفتقد الجميع بمراحمه ويحمي الجميع من كل شر. اصلي من أجل كل الكوادر الطبية وكل من يقع عليهم مسئولية مواجهة هذا الوباء القاتل ليعطيهم الرب النعمة والحكمة والشجاعة ليواصلوا رسالتهم بكل امانة وسلام، والرب يحميهم من كل شر. اصلي من أجل كل أبنائنا الطلبة الممتحنين في هذه الأيام ليعطهم الرب النور والحكمة ليجنوا ثمرة تعبهم ويكلل مجهوداتهم ومجهودات اسرهم واساتذتهم بالنجاح والفرح.
كونوا في سلام وأمان ودمتم في حماية الرب وحفظه بشفاعة أمنا مريم العذراء وجميع القديسين. آميــــــــــــــــــــــــــــــــن.